Nahibalo ko nga kung makabasa ka niini unya nahibalo ka usab kabahin sa panid sa usa ka mamumulit nga masabtan sa Bisaya nga "Mga Butang nga Wala'y Nagsulti Kanako Pero Nakat-onan Ko Guihapon" (Stuff No One Told Me But I Learned Anyway kung sa Ingles) ug kung nakabasa ka sa ika-12 nga binutad, mo-ingon tingali ka nga wa ko'y buot og gamay ko og utin! Pero wa ko'y labot! Kaugalingon ko kining akta ug isulat nako ang buot ko nga isulat, bahala na og unsa'y ikasulti ninyo!
Gisapot ko! Gisapot ko kaayo kay tulo ka tsinelas sa silong wala na'y pares! Ang usa, giguba ni Janggo og ang duha wala'y nakahibalo og asa. Gi-ahak!
Malinawon man unta ko nga pagka-tao. Giplano man gani unta nako nga ang kina-unhang pagsulat nako sa natawhang pinulungan kabahin guihapon sa URI, pero dili na jud matabang! Dili pod ko ganahan nga sa Ingles kini nako isulat dinhi kay daghan kaayong makasabot. Luoy intawon pod kadtong mahilo ang dagan sa ilang mga adlaw mahitungod kay nakabasa sila og maot gikan sa akong panid.
Mosulat lagi ko og maanindot nga Binisayang artikulo. Ayaw kaguol. Sabta lang usa ako sa pagkakaron kay ga-maot gayud ang akong buot. Mopaingon ako sa buhatan sa akong amahan mahuman ako niini. Magdungan kami og panihapon ug gusto ko nga humana ang akong mga nagdiling gipangbati sa pag-abot ko didto. Gusto ko nga magmalipayon ang akong kinaiya hangtod sa pag-uli ko dinhi sa among balay.
Pasaylo-a ako nga gipang-bubo ko tanan akong mga maoton nga kalabutan. Gusto ko gayud nga wala'y mantsa ang kadakuan sa akong adlaw. Oo, nakabasa ka og sakto. Bag-o pa ko nakamata. Usa ka oras pa lang kay alas siyete sa buntag na ako nipahulay gikan sa akong adlaw gahapon.
Dinhi ko na kini humanon. Dili ko na kini patas-an pa kay aduna pa ako'y pagabuhaton sa dili pa molarga. Makapangutana ka og unsa? Maligo!
